СКОПСКИ РАШТАК БЕЗ ВОДА ЦЕЛ МЕСЕЦ, СТАРИОТ ВОДОВОД СЕ РАСИПАЛ, НОВИОТ ФИНАСИРАН ОД ЕУ, НЕДОВРШЕН

    СКОПСКИ РАШТАК БЕЗ ВОДА ЦЕЛ МЕСЕЦ, СТАРИОТ ВОДОВОД СЕ РАСИПАЛ, НОВИОТ ФИНАСИРАН ОД ЕУ, НЕДОВРШЕНТаблата со податоците за инвеститорот и изведувачот на водоводот

    Скопски Раштак при два водоводи, еден месец, живее без вода. На стариот водовод има дефект, а новиот, чиј краен рок за завршување беше 1 јуни, сè уште се гради. За потребите на жителите ЈП „Водовод и канализација“ испраќа по две цистерни дневно.

    Општина Гази Баба вели дека се работи на поправка на дефектот на стариот водовод.

    „ Во моментов има посериозен дефект на филтер станицата за прочистување на водата. Делот е веќе порачан од Израел оти го само таму. Ветено е од нивна страна дека делот ќе биде испорачан за 15 дена“, рече Емилија Кипровска, портпарол на Општина Гази Баба.

    Делот од филтер станицата што е во дефект, бил дотрајан. Борис Трајковски, претседател на месната заедница Раштак вели дека делот е потрошен материјал и често се менува.

    „Овој дел се користеше сигурно веќе десет години и веќе беше амортизиран. Тој е клучен за прочистување на водата. Сега водата место низ два, минува само преку еден филтер и не е за пиење. Може да се користи како техничка вода, а за готвење и за пиење ’Водовод’ ни испраќа цистерни“, вели претседателот Трајковски.

    Водоводот е стар повеќе од четириесет години. Трајковски вели дека не е граден по стандарди туку минува низ бавчи и ниви, а им се појавувало и истекување вода кое не можат да го лоцираат. Сите проблеми треба да ги реши новиот водовод кој почна да се гради лани во ноември.

    „Примарната мрежа за високата зона е изградена, се гради и нов резервоар, но најавена е и секундарна мрежа, чија изградба воопшо не е почната. Работите се издолжија поради истечените мандати на градоначалникот и на советниците. Одлука за водоводот требаше да помине на Советот, но за да се изгласа советниците чекаа да се реши проблемот со мандатите. Сега е изгласана и изградбата е во тек“, вели Трајковски.

    Новиот водовод, кој подразбира изградба на резервоар за висока зона и изградба на примарна и секундарна водоводна мрежа за село Раштак, чини 123.490 евра. Европската унија учествува во финансирањето со 90.000 евра, а останатите ги обезбеди Владата на Република Македонија. Изведувач на градежните работи е АД „Енергомонт Скопје“ . Од Општината нема нов рок во кој треба да биде завршена изградбата на водоводот по пробивање првичниот рок, 1 јуни.

     

    ЧИТАЊЕТО Е БЕСПЛАТНО.

    АМА НОВИНАРСТВОТО НЕ Е.

    Поддржете го слободното, независно, професионално новинарство. Новинарство со интегритет.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира