Вицепремиерот Владимир Пешевски, обвинет во случајот „Траекторија“ на Специјалното јавно обвинителство, останува без пасош, одлучи тричлениот кривичен совет на Апелациониот суд Скопје. Жалбата му е одбиена, како што е одбиена и жалбата на СЈО во овој предмет, кое докрај остана на барањето Пешевски да добие мерка притвор, поради опасност од бегство, влијание врз сведоците и одлична имотна состојба на обвинетиот. Пешевски е еден од четворицата обвинети за проневерени 155 милиони евра во постапката за изградба на кинеските автопати.

Исто и на бизнисменот и новинар Драган Павловиќ – Латас му е одбиена жалбата за пасошот. Но и тука СЈО бараше притвор, поради што ја обжали одлуката на Кривичниот суд само да му биде одземен пасошот. Апелација одлучи да се одбие жалбата на СЈО.

И жалбите на обвинетите браќа  Звездан и Срѓан Павловиќ се одбиваат како неосновани, исто како и на Небојша Страјковиќ од „Трезор“, Љупчо Георгиевски обвинет во „Траекторија“ и на Ѓоко Поповски , обвинет во случајот „Триста“. Сите остануваат без пасош, одлучи Апелација.

Латас е обвинет за даночно затајување преку своите 4 фирми, во износ од 146 илјади евра, но и за бесправно градење, каде што е обвинет заедно со неговите браќа Звездан и Срѓан.

С. К. ДЕЛЕВСКА