Маратонската седница за разрешувањето на јавниот обвинител Марко Зврлевски продолжува денеска во 12 часот. Во саботата, на деветтото продолжение од расправата во најголем дел помина во реплики и контрареплики помеѓу пратениците на ВМРО-ДПМНЕ и во процедурални забелешки, но и со барање за одмор од пратениците на најголемата опозициска партија.

Претседателот на Собранието Талат Џафери првин ја закажа седницата за вчера, но потоа се премисли и расправата за разрешувањето на државниот јавен обвинител ја презакажа за денеска.

Откако е почната седницата за разрешувањето, пред скоро месец ипол, пратеникот и лидер на ВМРО-ДПМНЕ Никола Груевски не присуствува. Тој од надвор ги следи репликите и зборењето на неговите пратеници сами со себе, како и сè почестите инциденти што ги прават во Собранието, особено откако Апелациониот суд Скопје ги прифати бомбите од прислушуваните разговори како доказ.