СУДИИТЕ ЗА СЛУЧАИТЕ НА СЈО СУДЕЛЕ И НА „СОПОТ“, ДИВО НАСЕЉЕ“, „МОНСТРУМ“

    СУДИИТЕ ЗА СЛУЧАИТЕ НА СЈО СУДЕЛЕ И НА „СОПОТ“, ДИВО НАСЕЉЕ“, „МОНСТРУМ“Специјалното обвинителство за 18 предмети поднесе 17 обвиненија против 94 физички и 7 правни лица и побара притвор за 18 лица (Фото: СДК.МК)

    По обвиненијата што Специјалното јавно обвинителство денеска ги поднесе во Кривичниот суд ќе одлучуваат судии кои веќе судат предмети на СЈО, како и нивни колеги кои работеле или сè уште работат на големи случаи, како „Монструм“, „Сопот“ и „Диво насеље“. Специјалното обвинителство за 18 предмети поднесе 17 обвиненија против 94 физички и 7 правни лица и побара притвор за 18 лица.

    Како што информираше Кривичниот суд, случаите „Тарифа“, „ТНТ“ и „Траекторија“ се распределени кај судијките Лидија Петровска и Татјана Михајлова.

    Лидија Петровска, која во јавноста е позната како „сваровски-судијката“, според еден разговор од т.н. бомби што ги објави СДСМ, го суди случајот на СЈО „Тврдина 2“, во кој првообвинет е поранешниот началник на петтата управа Горан Грујовски. Нејзе и се падна да го суди и предметот „Транспортер“, во кој првообвинет е градоначалникот на Битола, Владимир Талески. СЈО во февруари оваа година до Советот за утврдување на факти поднесе претставка против Петровска заради нестручно и несовесно вршење на судската функција, а во септември минатата година бараше и нејзино изземање од случајот „Тврдина 2“.

    Татјана Михајлова го суди случајот за насилствата пред Општина Центар од јуни 2013 година, во јавноста познат како „Шамари“, во кој обвинети се лидерот на ВМРО-ДПМНЕ, Никола Груевски, поранешниот министер за транспoрт и врски Миле Јанакиески и пратеничката Даниела Рангелова. Михајлова на едно од рочиштата ги казни Фетаи и специјалната обвинителка Катица Јанева по 2.000 евра, поради неопочитување на судот. СЈО, пак до Советот за утврдување факти и покренување одговорност за судија, поднесе претставки против Михајлова поради нестручно и несовесно вршење на судската функција.

    Моника Бахчованска, која треба да ги оценува обвиненијата за предметите „Тотал“, „Тревник“, „Тифани“, „Титаник“ и „Тортура“, го судеше случајот за кражбата на артефакти од Музејот на Македонија, во кој на седуммината обвинети им пресуди високи казни, од вкупно 30 години затвор. Во случаите „Тотал“, „Тревник“, „Тифани“, „Титаник“ и „Тортура“, меѓу другите, се бара притвор и за Никола Груевски, Мартин Протоѓер, Кирил Божиновски, Миле Јанакиески, Гордана Јанкулоска и Драган Павловиќ Латас. Бахчовановска,  е сопруга на Владимир Бахчовановски, висок функционер од ВМРО-ДПМНЕ.

    Горан Бошевски, од одделението за организиран криминал кај кого се обвиненијата за случаите „Трезор “ и „ Тенк“, минатата година беше назначен за нов судија за случајот „Сопот“. Инаку, овој случај подолг период го бара Специјалното јавно обвинителство, но Советот на јавни обвинителни сè уште не одлучил дали ќе му го предаде.

    Верка Петковска која го доби обвинението за „Титаник 2“, во моментов го суди случајот „Диво насеље“, за настаните во Куманово од 9 и 10 мај 2015 година.

    Ленка Давитковска, кај која е распределен предметот „Топлик“, е судија во случајот против новинарот и сопственик на порталот „Буревесник“, Зоран Божиновски, обвинет за шпионажа, уцена и за изнуда.

    Ивица Стефановски од 2013 до декември минатата година му беше заменик на тогашниот претседател на Основниот суд Скопје 1 Владимир Панчевски. Стефановски го судеше случајот „Монструм“, во кој шестмината обвинети беа осудени на доживотни затворски казни за петкратното убиство кај Смиљковско езеро.

    ЧИТАЊЕТО Е БЕСПЛАТНО.

    АМА НОВИНАРСТВОТО НЕ Е.

    Поддржете го слободното, независно, професионално новинарство. Новинарство со интегритет.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира