Судијката Татјана Михајлова, кај која се падна обвинението против поранешниот премиер Никола Груевски за насилство во општина Центар и нарачаните шамари за Андреј Жерновски, е назначена за в.д. претседател на Основен Суд Скопје 1 на денешната седница на Судскиот совет. Таа ќе го води судот до изборот на нов претседател. За в.д. претседател на Врховен суд, пак, избрана е Снежана Бајлозова, една од кандидатидатките за претседател на Судот.

Четиригодишните мандати на претседателите на Основниот суд Скопје 1 Владимир Панчевски и на Врховниот суд Лидија Неделкова завршуваат денеска и Судскиот совет, по препораките од Антикорупциската комисија, соопшти дека претседатели на судовите ќе се избираат по парламентарните избори. Затоа и се оди на варијанта со в.д. претседатели.

Судењето за насилство во Центар, првично закажано за 21 ноември, Михајлова го одложи за 16 декември, по изборите.