Официјалното име на најголемиот стадион во Македонија останува „Филип Втори“, но за комерцијална употреба името ќе биде „Телеком арена“, вели Цветко Грозданов, директор на АД за стопанисување со станбен и деловен простор, под чија надлежност е стадионот.

„Официјалното име на стадионот со одлука на Владата е ‘Филип Втори’. ‘Телеком арена’ е име за комерцијална употреба“, изјави Грозданов на денешната прес-конференција.

На заедничкиот прес на Фудбалската федерација на Македонија и АДССДП, македонскиот репрезентативец Горан Пандев беше промовиран во амбасадор на Суперкупот на УЕФА.

Фудбалерот на Џенова Горан Пандев денеска беше промовиран во амбасадор на УЕФА Суперкупот, закажан за 8 август во Скопје (Фото: Ѓ. Личовски)

Суперкупот на УЕФА ќе се одигра на 8 август, а учесници ќе бидат победниците во Лигата на шампиони и Лига Европа.

Во Лига на шампиони останаа: Јувентус, Барселона, Атлетико Мадрид, Лестер, Борусија Дортмунд, Монако, Реал Мадрид и Баерн Минхен, додека во Лига Европа останаа: Андерлехт, Манчестер Јунајтед, Селта Виго, Генк, Бешикташ, Лион, Ајакс и Шалке.