Уште една непроспиена ноќ во Сплит и околината, а на местото на пожарите во Срињине, Жрновница, Подстрана, Строжанац и Сплит има 384 пожарникари и 102 возила. Во пожарите во овој дел на Хрватска изгореа многу куќи, деловни простории и автомобили. Дел од населението синоќа ги напушти домовите во погодените области.

(Фото: ХИНА)

Според груба проценка, пожарите кои се веќе 27 часа се активни на потегот од Омиш до Сплит проголтаа 4.500 хектари густа борова шума, трева, грмушки и маслинки, а пожарникарите вчера добија над 5.000 повици на вознемирените граѓани. По Сплит, пожарникарите ноќеска спасуваа куќи во Строжанац и Подстрана, но утрово куќите веќе не се загрозени.

Небото над Сплит денеска е уште сиво и непровидно, а во воздухот лета пепел и сè повеќе тешко се дише. Ветерот не дува, така што со помош на противпожарните авиони „канадер“ кои утрово излегоа на терен пожарот може наскоро да се стави под контрола.