Силен земјотрес, кој според првичните мерења бил со интензитет од 6,7 степени по Рихтеровата скала го погоди подрачјето во Егејско море помеѓу турскиот туристички центар Бодрум и грчките острови Кос и Родос.

Локалните медиуми јавуваат дека луѓето се на улиците, а засега нема информации за евентуални жртви или повредени.

Земјотресот се случил во 1 часот и 31 минута по полноќ.

Градоначалникот на Бодрум Мехмед Кочадон во изјава за Хуриет рекол дека сè уште е рано да се прават проценки на штетите.

Туристи на социјалните мрежи постираа слики од поплавени крајбрежни хотели и луѓе што се кријат под масите. Тие раскажуваат дека на плажите водата се дигнала за триесетина степени, а потоа имало и мало цунами кое предизвикало поплава во хотелите покрај плажите.

Според  непотврдени извештаи, била евакуирана и болницата во Бодрум.

Слики од изместени лежалки на плажите постираа и туристи од Родос и Кос во Грција.

Во Бодрум и околината на некои места снемало вода и струја.

Земјотресот се почувствувал и во Измир и во туристичкото одмаралиште Фетие, како и во космополитското Мармарис кое што е популарно и кај македонските граѓани, како и на островите од групата Додеканези околу Кос и Родос.

По главниот удар, кој според сведоштвата траел 30-тина секунди, забележани се уште неколку силни, но поумерени земјотреси со јачина од 5,1 и 4,6 степени.

Сеизмолозите изјавиле дека можно е да нема урнатини на брегот затоа што епицентарот бил под море и водата го амортизира главниот удар.