Турците изгласаа да му се зголемат овластувањата на претседателот Реџеп Тајип Ердоган, покажаа првичните резултати од денешниот референдум. По преброени 90 отсто од гласовите, „Да“ имаше 52,7 отсто, објавија турските државни медиуми.

Поддржувачите на Ердоган велат дека замената на парламентарниот систем со претседателски ќе ја модернизира земјата. Победата на „Да“ ќе овозможи 18 уставни реформи коишто ќе му дадат моќ на претседателот да назначува владини министри, високи функционери и половина од членовите на Врховниот суд, а ќе може и да издава декрети. Со новиот систем, Ердоган може да остане  на претседателската функција до 2029 година.

Околу 55 милиони имаат право на глас на 167.000 избирачки места, а излезноста беше висока.

Претходно денеска, тројца луѓе загинаа во вооружена престрелка во југоисточната провинција Дијарбакир, наводно по расправија како треба да се гласа.