Посредникот на Обединетите нации Метју Нимиц вели дека сега е моментот да се донесе одлука за името и дека неговиот нов пакет предлози не го загрозува македонскиот идентитет. Во интервју за „Сител“, Нимиц кажа предлогот не само што не навлегува во идентитетот, туку напротив го зацврстува и зајакнува.

„Се обидов да најдам начин да се справам со прашањето за името на начин кој ќе биде прифатлив за двете страни. Мојот личен став е дека не навлегува во индентитетот, туку напротив го зацврстува и зајакнува идентитетот на државата и на народот. Од мојата комуникација со луѓето во вашата земја, сметам дека имате многу силен идентитет, кој го поседувате многу години. Независни сте 25 години, но имавте идентитет и кога бевте дел од Југославија, имавте идентитет кога бевте дел од Кралството Србија и од Отоманската империја“, вели Нимиц.

За Нимиц, сега е моментот за решавање на спорот затоа што во двете земји е промената ситуацијата, а и нема избори наскоро.

„Атина излегува од економска криза, поуверени се и пробуваат да играат поголема улога во регионот. Во Скопје имаме нова влада која се чини дека е посветена на решавање на проблемот. Сега имам две влади со сериозни луѓе, двајца сериoзни премиери и двајца министри за надворешни работи, тука е опозицијата и медиумите и еднаш ќе мора да донесете одлука. Сега е моментот бидејќи нема избори. Да не се чека уште 25 години“, вели Нимиц.

Посредникот имаше средба во Њујорк со преговарачите Адамантиос Василакис и Васко Наумовски во средата, на која им го презентираше новиот пакет предлози, за кој тој вели дека е на четири страници. Нимиц најави дека е подготвен да го посети регионот доколку сакаат министрите за надворешни работи на двете земји и доколку се слободни во следните десетина дена.

„Да седнеме во двете земји и да имаме сериозни разговори за тоа што тие сметаат дека е корисно и да најдеме заеднички компромис“, вели посредникот.