Исплатата на капитацијата на матичните лекари, стоматолози и гинеколози во ноември во износ од 493.127.241 денари е во тек и се реализира согласно роковите, рече на денешната прес-конференција директорот на Фондот за здравствено осигурување Сашо Клековски.

САКАМДАКАЖАМ.МК на 6 декември, по реакција на повеќе матични лекари, објави дека три месеци доцни исплатата на капитацијата. Капитацијата што по договор требаше да им биде исплатена до 30 ноември, а редовно се доцни по 5-6 дена, не беше исплатени ни на 5 декември, пред тридневен продолжен викенд.

Матичните лекари регираа дека последната капитација што ја земале е за август.

• ФОНДОТ ЗА ЗДРАВСТВО ДОЦНИ ТРИ МЕСЕЦИ СО ИСПЛАТАТА НА КАПИТАЦИЈАТА НА МАТИЧНИТЕ ЛЕКАРИ
• ОД 75 НА 100 ДЕНАРИ СЕ ЗГОЛЕМУВА КАПИТАЦИЈАТА НА МАТИЧНИТЕ ЛЕКАРИ И ГИНЕКОЛОЗИ, А НА СТОМАТОЛОЗИТЕ ОД 61 НА 75 ДЕНАРИ

„Значи, сѐ што сме работеле во септември, октомври и декември не ни е платено. Недозволиво е Фондот за здравство да доцни 3 месеци за капитација. Тоа значи дека матичните доктори финанисираат 3 месеци лечење без средства, а имаат платено плати, придонеси, и други трошоци навреме“, реагираат матичните лекари.

Клековски денеска рече дека според договорот склучен меѓу Фондот и матичните лекари, Фондот има рок од 60 дена за исплата по прифаќањето на фактурите.

„Матичните лекари треба фактурите за претходниот месец да ги достават од 1 до 10. во тековниот месец. Исплатата во ноември во износ од 493.127.241 денари е во тек и се реализира согласно роковите. Фондот обезбедува транапарентност и предвидливост во системот. Исто така, договореното зголемување на капитациите од 33 отсто се спроведува. Заклучно со 9 декември, активни се 948 договори за општа медицина, 972 за општа стоматологија и 149 за гинекологија. Од јули 2024 Фондот се придржува на договорените обврски“, кажа Клековски.

Д-р Лили Чолакова-Дервишова, претседателка на Здружениото на приватни лекари, ни рече: „Секогаш ја добиваме со џентлеменски договор со каснење од 67 дена и така е со децении“.

За реакциите за доцнењето за исплатата на породилните отсуства, Клековски рече дека главнината се исплаќа помеѓу 10-ти и 20-ти во месецот.

„Таа тековно се одвива во континуитет и за ноември се исплатени над 6.600 породилни отсуства. Ние правиме анализи, согледувања, бидејќи бројот на исплатени породилни отсуства секој месец варира. Можниот проблем во декември е решен со прераспределбата во буџетот каде што е зголемена позицијата за породилни отсуства и кај нас и кај Министерството за труд, бидејќи имавме раст на вкупниот број на породилни исплати поради зголемувањето на платите, а  не поради зголемување на бројот на бебиња и на породилни отстува“, кажа Клековски.

Тој додаде дека најчест проблем со исплатата на породилните отсуства е поради задоцнетото пријавување на родилките од страна на работодавачите, а често доцнат и државни институции.

Б. НЕСТОРОСКА