Виктор Орбан ги обвини Украинците за заговор за напад врз неговото семејство, заострувајќи го спорот помеѓу Будимпешта и Киев пред клучните избори во Унгарија. Тој објави видео на Инстаграм кое го прикажува како телефонски разговара со своите ќерки.

„Сигурен сум дека ќе видите на вести како Украинците се закануваат не само на мене, туку и на вас. Мора да го сфатиме ова многу сериозно, но не смееме да се плашиме“, вели Орбан со емотивен глас.

Унгарскиот премиер очигледно реагираше на зборовите на бившиот украински политичар и разузнавач Григориј Омелченко, кој во ТВ-интервју оваа недела му се закани на Орбан, сугерирајќи дека одмаздници би можеле да го фатат ако не го промени својот антиукраински став.

Претходно, Володимир Зеленски се закани дека „ќе ја даде адресата на ова лице на нашите вооружени сили“ додека зборуваше за Орбан, за што беше опоменат од европските сојузници да ја ублажи својата реторика.

Украина е една од најистакнатите теми во предизборната кампања во Унгарија, додека Фидес на Орбан заостанува 20% во однос на главниот противкандидат Петер Маѓар. Унгарија ја обвини Украина дека намерно одолжува со поправката на нафтоводот „Дружба“ низ кој тече руска нафта, а минатата недела заплени украински возила со 80 милиони долари во готовина и девет килограми злато.

Орбан тврди дека победата на Маѓар ќе ја вовлече Унгарија во војната во Украина и се прикажува себеси како кандидат за мир кој е неутрален во конфликтот.