Документарниот филм „Приказната за Силјан” на Тамара Котевска вчера ја имаше американската премиера во САД, во преполната сала во Меѓународниот филмски центар во Њујорк. Филмот веќе почна да собира номинации во сезоната на филмски награди во САД, но и позитивни критики.

„Спојувајќи мит и реализам со извонредна чувствителност, Котевска создава дело со ретка поетска моќ, филм што набљудува, слуша и на крајот ја осветлува тивката, тврдоглава убавина на самиот живот“, напиша Даниел Ховат од „Next Best Picture“.

Сајтот „Screenanarchy“ го опиша филмот како „зачудувачки прецизно визуелно раскажување“, додавајќи дека е „чудо меѓу чудата“.

„Котевска се докажа како извонредна режисерка која може да создаде маестрални приказни преку нејзиниот воздржан пристап кон документарното снимање филмови. Таа не раскажува само приказна за земјоделец во туѓа земја, таа гради приказна со која сите можеме да се поврземе во нашиот денешен свет, во еден од најдобрите документарци оваа година“, напиша сајтот „Collider“.

Котевска со кинематограферот на филмот Жан Дакар

Во рецензијата на „Њујорк тајмс“ се вели дека „Силјан“ е спој на документарец за природата, социјална приказна и бајка, а штрковите даваат вонземска атмосфера во прикажувањето на едно село кое изумира.

„Овие птици се како неми сведоци на исчезнувањето на заедницата, како духови или чувари на животот во селото, додека луѓето си заминуваат“, напиша Алиса Вилкинсон.

„Силјан“ доби максимални четири ѕвездички од сајтот „Rogerebert“, чиј автор Карлос Агилар напиша:

„Котевска, чиј претходен документарец ‘Медена земја‘ ја следеше приказната за посветена пчеларка, има афинитет кон документирање начини на живот што исчезнуваат. ‘Приказната за Силјан‘ функционира како дијалект помеѓу мудроста на стариот свет и современите социоекономски реалности, помеѓу природното царство и грижите на човештвото, таа е и духовна и хуманистичка“.

Филмот продолжува да се прикажува во кината во САД.