Том Стопард, еден од најпознатите британски драмски автори, почина на 88 години, објавија неговите менаџери.

Стопард доби Оскар и Златен глобус за најдобро сценарио за филмот „Вљубениот Шекспир“. Меѓу неговите најпознати драмски дела се „Вистинската работа“ и „Розенкранц и Гилденстерн се мртви“.

„Тој ќе биде запаметен по неговите дела и нивната брилијантност и човечност, по неговите досетливост, великодушност и длабока љубов кон англискиот јазик“, објавија „Јунајтед ејџентс“.

Роден како Томас Штрауслер во Чехословачка, тој избегал од својот дом за време на нацистичката окупација и нашол засолниште во Велика Британија. Работел како новинар во Бристол во 1950-тите, по што станал театарски критичар и почнал да пишува драми за радио и телевизија. Се прославил во 1960-тите со драмата „Розенкранц и Гилденстерн се мртви“.

Стопард ги пленеше срцата на публиката повеќе од шест децении со дела што истражуваат филозофски и политички теми. Тој, исто така, пишуваше за филм, телевизија и радио. Меѓу другото, го адаптираше романот „Ана Каренина“ за филмот од 2012 со Кира Најтли и Џуд Ло.

Во 2020 го објави полуавтобиографското дело „Леополдштат“, сместено во еврејскиот кварт во Виена на почетокот на 20. век, кое подоцна му ја донесе наградата Оливие за најдобра нова претстава, која, пак, доби четири награди Тони.