Соработниците на американскиот секретар за одбрана Пит Хегсет оштетиле историски глобус поврзан со поранешниот претседател Двајт Ајзенхауер додека се обидувале да го пренесат во канцеларијата на Хегсет во Пентагон, објави „Вашингтон пост“.

Глобусот со дијаметар од околу 76 сантиметри (30 инчи), кој потекнува од 1930-тите години, им паднал на вработените за време на обидот за преместување, при што настанала дупка на површината во близина на Антарктикот и се одвоил од металниот држач што овозможува негово ротирање.

Војската на САД го потврди оштетувањето, наведувајќи дека инцидентот се случил при обид за преместување на 3 февруари. Портпаролот на војската, Кристофер Сариџ, соопшти дека артефактот на крајот не бил префрлен во канцеларијата на министерот.

Според извештајот, тимот на Хегсет побарал еден од двата глобуса поврзани со Ајзенхауер што се чуваат во Пентагон да биде пренесен во неговата работна просторија. Се верува дека тие глобуси ги користел Ајзенхауер за време на Втората светска војна, кога служел како генерал во американската војска.

Ваквите предмети вообичаено ги преместуваат обучени куратори од Центарот за воена историја на Армијата на САД. Но, бидејќи членовите на центарот биле на принуден одмор поради делумна блокада на работата на владата, соработниците на Хегсет се обиделе сами да го пренесат експонатот без стручна помош.

Ајзенхауер служел како генерал со пет ѕвезди за време на Втората светска војна и командувал со сојузничките сили за време на истоварувањето во Нормандија во 1944 година, а подоцна бил 34. претседател на САД од 1953 до 1961 година.

Оштетениот предмет е еден од двата глобуса поврзани со Ајзенхауер што се наоѓаат во зградата на Пентагон, додека вториот е изложен во канцеларијата на началникот на Генералштабот на Армијата на САД.