По ненадејната смрт на кореографот и играорец Симеон Чулев, Националниот ансамбл за народни игри и песни на Македонија „Танец“ го откажа годишниот концерт кој беше претходно најавен за на 20 декември.

Чулев беше погребан вчера на гробиштата „Камник“ во населбата Ченто.

„Загубата на Симеон Чулев е огромна и ненадоместлива за целиот ансамбл. Тој беше нераскинлив дел од играорниот кор на ‘Танец’, уметник кој со својата посветеност, енергија и врвно мајсторство остави неизбришлив белег во историјата на македонската фолклорна уметност. Во овие моменти на голема жалост, сите членови на ‘Танец’, сметаме дека во вакви мигови на тага, не е можно да се слави традицијата на сцена, кога ја изгубивме една од нејзините најсветли фигури“, соопштија од „Танец“.

Традционалниот Новогодишен концерт требаше да се одржи во Националната опера и балет (НОБ). Од „Танец“ велат дека сите кои веќе купиле влезници за концертот ќе можат да ги рефундираат средствата на продажната мрежа од каде што се купени билетите. За дополнителни детали околу новиот термин или евентуални измени, јавноста ќе биде навремено известена.