На Саемот на книгата во Скопје вчера беа промовирани новите книги од областа на психологијата, меѓу кои и Прирачник за стрес, здравје и справување со стрес од Сузан Фолкман. „Арс Студио“ одржа панел-дискусија на тема „Стрес и справување со стресот во современиот живот“ во Промотивниот центар во хала 2, на која гостинот Мирослав Пендароски ги запозна присутните со новите технологии, новите мултидисциплинарни пристапи, научната љубопитност и барањата на јавноста, кои во последните 30 години придонесоа за подем на истражувачките потфати фокусирани на стресот, справувањето со стрес и здравјето. Освен Прирачник за стрес, здравје и справување со стрес од Сузан Фолкман, беа промовирани уште два наслова, Природата на предрасудите од Гордон Олпорт и Човековата потрага по смисла од Виктор Франкл.

Претходно,„Арс Студио“ ја промовираше најновата книга на американскиот претседател Доналд Трамп – Повторно величествена, која е една од најчитаните книги што се продава во милионски тиражи. Посетителите можеа да се информираат за дел од плановите и идеите на Трамп, како и конкретните идеи за нивна реализација. „Арс Студио“ ги има ексклузивните права за македонското издание на книгата Повторно величествена, која можете да ја купите единствено на нивниот штанд.