Мартин Скорсезе сними документарен филм со покојниот папа Фрањо, кој вклучува разговори помеѓу нив и последното интервју со папата пред камера.

„Алдеас – нова приказна“ раскажува за непрофитната меѓународна организација „Сколас окурентес“, основана од Фрањо во 2013 за да ја промовира „културата на средба“ помеѓу младите. Филмот е снимен на локации во Индонезија, Гамбија и Италија.

„Документарецот ќе биде сведоштво за трајното верување дека креативноста не е само средство за изразување, туку и пат до надежта и трансформацијата“, објави продукциската куќа на Скорсезе, „Сикелија“.

Засега не е објавено кога ќе излезе филмот.

„Сега, повеќе од кога било, треба да разговараме едни со други, да се слушаме меѓусебно меѓукултурно. Еден од најдобрите начини да се постигне ова е преку споделување лични животни приказни и искуства. На папата Фрањо му беше важно луѓето ширум светот да разменуваат идеи со почит, а истовремено да го зачуваат својот културен идентитет и киното е најдобриот медиум за тоа“, рече Скорсезе, кој неколкупати се сретнал со Фрањо.