Премиерот Емил Димитриев попладнево до Собранието поднесе предлог за разрешување на министерот без ресор Фуркан Чако, и за именување на Бејџан Иљас на негово место. И Чако и Иљас се од Демократската партија на Турците во Македонија, коалиционен партнер на владејачката ВМРО-ДПМНЕ.
Според биографијата што Димитриев ја доставил до Собранието, 40-годишниот Иљас е лекар во Клиничката болница во Тетово.
Неофицијално, извори од Демократската партија на Турците велат дека Чако се разрешува поради несогласувањата со пратеникот и доскорешен партиски лидер Кенан Хасипи. Хасипи се повлече од лидерското место во партијата и следат избори на нов избор. Наводно, Чако кој е опонент на Хасипи, сакал да се кандидира за партиски лидер и сега го разрешуваат од министер за да му ги намалат шансите да ја предводи партијата. Истите извори велат дека предложениот министер Иљас не е многу експониран во партијата.
Во партијата не коментираат дали судирот има врска со барањата на официјалната власт на Турција да се идентификуваат во Македонија приврзениците на свештеникот Фетулах Ѓулен, кој е обвинет за неуспешниот пуч во Турција во јули.
