„Нееднаквости: дизајн за подобар живот“ е тема која нѐ повикува да размислуваме за улогата на урбаниот дизајн во справувањето со големите предизвици на нашето време, социјалната инклузија, оддржливоста и технолошките иновации за создавање поинтелигентни и поефикасни градови прилагодени на човечкото живеење, рече денеска италијанскиот амбасадор во земјава Паоло Палминтери. На Факултетот за информатички науки и компјутерско инженерство (ФИНКИ) во Скопје во организација на Амбасадата на Италија, а во соработка со Италијанската трговска агенција се одржа конференција во чест на Денот на италијанскиот дизајн. Тоа е проект на италијанското Министерство за надворешни работи со кој се промовира дизајнот како универзална експресија на „Произведено во Италија“ (Made in Italy).
„Италија е земја пионер во интегрирањето на традиционалната естетика со современата еколошка свест, како и во напредокот со практиките за урбано планирање правејќи многу од италијанските градови модел за градовите низ целиот свет. Одржливиот развој во италијанските градови се води од неколу клучни принципи, кои имаат цел да го балансираат урбаниот раст со зачувувањето на животната средина и социјалната еднаквост“, рече Палминтери.
На денешниот настан беа претставени успешни примери за урбана регенерација и развој на градот Торино, кој во изминатите 25 години, станал школски пример за урбана трансформација. Старите индустрски зони и згради се пренаменети со помош на стратегија за управување со сообраќајот и промоцијата на економија базирана на знаење, а градот се позиционира како атрактивна бизнис и туристичка локација со сосема нов идентитет базиран на инклузивност, култура, гастрономија и модерна уметност.
Денот на италијанскиот дизајн, како што рече министерот за дигитална трансформација Стефан Андоновски, е одлична можност за размена на искуства со италијанските пријатели за разубавување на животот преку примери за надминување на нееднаквостите, урбана иновација, технологија и одржливост.
„Технологијата, кога се користи во рамките на една интегрирана и целосна општествена трансформација e основа за изградба на иднина која ќе биде праведна, инклузивна и посветена на потребите на сите наши граѓани. Дигитализацијата е алатка која го олеснува животот на секој граѓанин. Технологијата кога се употребува во екосистем кој подразбира дизајн, иновации и севкупен општествен развој, претставува вистинска употреба на дигиталните технологии. Мојата визија е да изградиме едно општество каде технологијата не само што ја подобрува секојдневната ефикасност, туку го прави животот на секој граѓанин полесен, подобар и подостапен“, рече министерот.
