Пратеникот на СДСМ Миле Талески на денешната собраниска седница посветена на пратенички прашања обвини за селективна правда за катастрофата во кочанската дискотека „Пулс“ и рече дека нема кривична пријава за функционери од актуелната власт, а има за нивни претходници во инспекторатите, иако пожарот во кој загинаа 59 млади луѓе и деца се случи во време на владеење на ВМРО-ДПМНЕ.

Талески побара морална оставка од функцијата од министерот за внатрешни работи Панче Тошковски, а тој му рече дека се срами што го слуша пратеникот.

Талески покажа и фотографија од партиски состанок на којшто се гледа дека присуствува Томо Донев, началникот на крим-полицијата во Кочани.

„Министре Тошковски, клучна улога во обезбедувањето јавни собири има МВР, односно Бирото за јавна безбедност (БЈБ). Досега меѓу приведените или опфатените со истрагата не е ниту еден командир, инспектор, началник или повисок функционер на МВР од ОВР Кочани, СВР Штип или БЈБ, кои кога се случил настанот биле на функциите, иако тие на 16 март биле на различни позиции, биле дежурни и најважно имале законска надлежност и обврска да постапат вечерта за време на трагедијата. Како е можно да не бидат предмет на истрага функционери кои вечерта биле на функции, а не презеле никакви мерки за спречување или заштита?“, праша пратеникот.

Талески дополни дека меѓу овие актуелни началници е Томо Донев, началникот на криминалистичката полиција на Кочани кој бил на функцијата на денот кога се случи трагедијата и покажа фотографија од него на партиски состанок во ВМРО-ДПМНЕ.

„Томо Донев е фотографиран на партиски состанок на ВМРО-ДПМНЕ во Кочани и оваа фотографија е објавена и јавно достапна. Согласно законот и согласно ваши изјави министре Тошковски, ниту еден полициски службеник не смее да биде член на политичка партија. Дали ова е причината поради која досега ни Донев, ни некој друг функционер на МВР што вечерта бил на функција, не е опфатен со истрагата?“, постави Талески уште едно прашање до Тошковски.

Министерот излезе на говорницата и кажа дека му било срам да го слуша Талески.

„Нема право да се дрзне кој било јавен функционер вклучувајќи ве и вас, да ја манипулира македонската јавност за факти кои се лага, за членови и закони кои се однесуваат на друга фактичка состојба, се со единствена цел политички да профитирате“, кажа Тошковски.

Не одговори на прашањето, туку рече дека во минатото немало кривични пријави  за изгорената модуларна болница во Тетово, за сообраќајните несреќи во Бугарија, Ласкарци и други и наведе колку пријави и колку уапсени има за трагедијата во Кочани.

Тошковски рече дека МВР не селектира кој од која партија ќе биде осомничен, туку работи по наредба на обвинител. Додаде дека истрагата уште тече.

„Министре, зошто сте нервозен? 15 месеци сте министер за внатрешни работи и уште не знаете каде се наоѓате и која функција ја обавувате. Овде сте избрани од ова Собрание да одговарате на прашања, а не да поставувате. Избегнавте одговор на сите прашања што ви ги поставив“, кажа по него Талески, посочувајќи му го Законот за јавни собири, според кој тој тврди дека министерот, односно МВР како орган на откривање требало да постапи.

Му кажа дека не е овде за политички памфлети.

„Вака може да се однесувате пред Унијата на млади сили на ВМРО-ДПМНЕ. Овде сте должни да одговорите пред граѓаните. На 16 март имавте можност да си поднесете оставка. Еве можете и денеска“, рече Талески.

Тошковски рече дека Законот за јавни собири што го цитирал Талески, не се однесува на конкретниот настан, на пожарот во дискотеката во Кочани.

За началникот Томо Донев рече дека се води дисциплинска постапка. А за тоа дека ги спомнува Ласкарци и другите несреќи, ги спомнува зашто не била поднесена ниту една кривична пријава против надлежни во МВР, за разлика од сега.

Талески праша и откај му се строго доверливите материјали на членот на  обезбедувањето на премиерот Христијан Мицкоски кој тргувал со нив, со оглед на тоа дека работел во управа која немала допир со овие информации.

„Заврши времето кога ќе крене некој телефон и ќе го спасите тој што треба да се спаси“, кажа Тошковски.

Талески му кажа дека пак Тошковски не одговори и оти кажува политички памфлети од говорницата.

С. К. ДЕЛЕВСКА