Врската меѓу граѓаните и пратениците во македонското Собрание е целосно изгубена, кажа Емил Атанасовски, директор на фондацијата за демократија Вестминстер за Западен Балкан, на презентација на резултатите од проектот „Граѓаните во Собранието“.
„Многу малку граѓански иницијативи има во Собранието, особено последните десетина години имаме се помалку претсавнички систем. Собранието има механизми за соработка со граѓанскиот сектор, но тие не се искористени. Сега има добар политички момент тоа да се смени, бидејќи преку овој проект граѓанските организации понудија иницијативи за законски измени со кои практично ќе се смени и животот на одредени луѓе“, кажа Атанасовски.
Ивана Петкуќеска, програмски координатор во Вестминстер, кажа дека изминатите две години работеле да го адресираат недостатокот на дијалог меѓу граѓанските организации и Собранието, со тоа што им помагале на 10 граѓански организации да изменат закони кои се однесуваат на различни човекови права, здравствена заштита, социјална заштита, судство, дискриминација.
„Сè уште немаме резултат од типот да кажеме ете тој закон се измени имаме нов закон, но она што може да го забележиме сепак е прогрес во насока на мало отворање на Собранието кон граѓаните, но и кон учење на граѓанските организации како да им пристапат на пратениците“, рече Петкуќеска.
Таа објасни дека во случајов проблемот е на двете страни, односно и граѓанските организации не знаат како да го преточат во конкретен предлог закон она што им е проблем и за што се експерти, а од друга страна се пратениците, кои треба да ја увидат користа од соработката со граѓанските организации за да создадат подобри закони.
„Предлозите кои ги доставија граѓанските организации до Собранието успеаја да влезат во работни групи, да се отворат законите за промена, но законската измена е бавен процес. Пациентите со ретки болести претходно беа невидливи пред законот и не беа третирани како посебна категорија, овој пат се отвори прашањето за овие пациенти. Се отвори прашањето за социјална заштита што почнаа да се разгледуваат измени, кои ги таргетираат лицата со посебни потреби и нивните семејства. Имаше и измени во законот за дискриминација имаше и работна група во Министерството за труд и социјална политика, кои ги има во предлог-законот, но тие треба да минат во Собрание“, вели Петкуќеска.
Ања Босилкова Антовска, од здружението на пациенти со ретка болест Вилсон-Македонија, кажа дека и покрај проблемите со кои се соочиле, пред сè поради разни блокади во собранието, како и фактот што три месеци немаше министер за здравство, сепак нивен претставник е дел од работната група, која работи на измени на Законот за здравствена заштита и дека изготвиле национален план за третман на ретките болести.
„Со решавање на проблемите на пациентите со ретки болести, не се решава само нивниот проблем, туку и проблемот на нивното семејство, затоа ќе продолжиме со активностите и нема да дозволиме овие пациенти повторно да бидат невидливи пред законот“, рече Босилкова Антовска.
