Во тек се научни истражувања во пештерите во Националниот парк Галичица, во рамките на проектот „Заштита на пештерските екосистеми и загрозените растителни и животински видови во Националниот парк Галичица од негативните ефекти на климатските промени“. Стручни лица ќе спроведуваат спелеолошки, биоспелеолошки, петрографски и микроклиматски испитувања во пештерите, а се работи и на утврдување на состојбата на пештерските екосистеми и на влијанието на климатските промени врз пештерите.

Проектот кој ќе се реализира во наредните три години е поддржан од Фондот за природа Преспа-Охрид (ПОНТ) а се спроведува од Истражувачко друштво „Урсус Спелеос” и Црвен крст Охрид.

Како дел од проектните активности се научното истражување на пештерите Самотска Дупка и Лескоечка за биодиверзитет, геодиверзитет и климатски фактори, инвентаризирање на сите пештери на територијата на Националниот парк, научно истражување на загрозениот биодиверзитет на заштитеното подрачје во Охридската и Преспанската Котлина преку мапирање, фотографирање, евидентирање на загрозени и ендемични видови, подготвка на видео-материјал за превенција на влијанието на климатските промени врз пештерските екосистеми и загрозените растителни и животински видови во Националниот парк како и мерки за намалување на ризиците од природни катастрофи предизвикани од климатските промени. Исто така се предвидени и обуки за заштита при шумски пожари.

„Досега имаме спроведено две теренски истражувања а во текот на целата година ни се планирани спелеолошки истражувања. Предвидено е четирисезонско истражување на пештерите Самотска Дупка и Лескоечка пештера и инвентаризација на пештерите на Галичица која се прави за првпат во Македонија и ќе биде основа, урнек како треба да изгледа националната база. Четирисезонското истражување на пештерите подразбира петрографски анализи на карпест материјал, спелеолошки карактеристики и био- спелеолошки карактеристики“, вели Билјана Гичевски од „Урсус Спелеос”

„Четирисезонското истражување на пештерите подразбира петрографски анализи на карпест материјал, спелеолошки карактеристики и био- спелеолошки карактеристики“, вели Билјана Гичевски од „Урсус Спелеос”. (Фото: СДК.МК)

Во рамките на проектот поставена е заштитна врата на влезот на Лескоечка Пештера, со што се заштитени пештерските канали, лилјаците и останатата пештерска фауна.

„Овозможен е прелет на лилјаците од пештерата и надвор во средината, а од друга страна пештерата е заштитена од несакани и несовесни посетители“, вели Гичевски.

Од Националниот парк Галичица, велат дека целта на проектот е јакнење на капацитетите на установата и подигнување на свеста на локалното население за адаптација кон климатските промени и за заштита на загрозените растителни и животински видови и пештерските екосистеми.

„Проектните активностите ќе бидат од значење не само за Националниот парк Галичица, локалното население и невладините организации (преку унапредување на нивните капацитети), туку и за поширокото образование базирано на мрежата од организации и образовни институции. Сите проектни активностите се утврдени согласно Планот за управување со Националниот парк Галичица и Стратегијата за еколошка едукација и ќе станат дел од нив“, велат од Галичица.

Проектот кој ќе се реализира во наредните три години е поддржан од Фондот за природа Преспа-Охрид (ПОНТ) а се спроведува од Истражувачко друштво „Урсус Спелеос” и Црвен крст Охрид. (Фото: СДК.МК)

Во просториите на оваа јавна установа во Охрид отворена е и лабораторија, наменета за надополнување на активностите во полето на еколошка едукација и на работата на Националниот парк во редовните мониторинг активности. Лабораторијата е опремена со соодветна опрема како што се: микроскоп, флакони, епрувети, епендорфи, пинцети, мензури, стаклени чашки, петриевки и слично.

С. ВРЕНЦОВСКА