Малкумина Италијанци биле толку влијателни и контроверзни како Силвио Берлускони, кој почина на 86 години од редок тип на леукемија. Од продавач на правосмукалки преку градежен бизнис до медиумско царство, Берлускони беше еден од најбогатите луѓе во Италија, а со меѓународно признание се здоби како сопственик на фудбалскиот клуб Милан.

Во политиката влезе во 1993, кога ја основа партијата Напред Италија и потоа водеше четири влади и две децении беше најмоќната личност на националната политичка сцена.

Неговата политичка кариера ја следеа и финансиски и секс скандали. Тој тврдеше дека за период од 20 години имал 106 судења и дека 2.500 пати се појавил во суд. Меѓу другото, беше обвинет за проневера, даночна измама, лажно сметководство, обид за поткуп на судија, но и дека платил за секс со малолетни проститутки.

Две децении беше најмоќната личност на италијанската политичка сцена (Фото: АП)

Иако во повеќе наврати беше ослободен или му беа поништени пресудите, Берлускони беше осуден за даночна измама во 2013, поради што му беше забрането да врши јавна функција осум години, а едногодишната затворска казна ја отслужи преку општокорисна работа во католички дом за стари лица во Милано.

Последното обвинение против него беше отфрлено во февруари оваа година, кога судот пресуди дека не поткупувал сведоци да лажат за озлогласените забави „бунга бунга“, што ги организирал во својата вила додека беше премиер.

Тој никогаш не ја криел својата склоност кон млади жени, а последната партнерка му беше 33-годишната пратеничка Марија Фашина. Втората сопруга Вероника Ларио ја запознал откако настапила полугола во една претстава, а се разведоа откако тој беше снимен на забавата за 18. роденден на моделот Неоми Летиција.

Берлускони последно беше во врска со 33-годишната пратеничка Марија Фашина

Сепак, најпознатиот скандал се забавите „бунга бунга“, на кои присуствувале стриптизети и малолетни проституки. За нив се дозна во 2010, кога Берлускони се јавил во полициска станица за да побара ослободување на 17-годишната Карима Ел Маруг, тврдејќи дека е внука на претседателот на Египет.

„Никогаш не сум платил за секс со жена зашто така го снемува задоволството од освојувањето. Сепак, признавам дека не сум светец“, кажа Берлускони своевремено.

Дел од своето огромно богатство го трошеше и на лични интереси, па така во 1986 го купи фудбалскиот клуб Милан и не само што го спаси од банкрот, туку за кратко време го претвори во европска фудбалска суперсила. Во 2017 го продаде на кинески инвеститори за 740 милиони долари и потоа купи друг фудбалски клуб, Монца, која потоа за првпат во својата историја се пласираше во Серија А.