Премиерот на хутската влада и други високи функционери на групата поддржана од Иран се убиени во вчерашниот израелски воздушен напад во Сана, објавија јеменските и израелските медиуми. Израел досега не го потврдил ова.

Јеменските медиуми објавија дека хутскиот премиер Ахмед ал-Рахави загинал во израелски напад врз станбена зграда, при што загинале и неколкумина негови блиски соработници.

Ова наводно бил одвоен напад од оној чија мета биле десетмина хутски министри кои биле собрани на локација надвор од Сана за да го слушаат говорот на лидерот на хутите Абдул Малик ал-Хути.  Меѓу нив биле и министерот за одбрана и шефот на војската на хутите. Израелската телевизија „Канал 13“ вчера цитираше неименувани извори дека „нападите биле успешни и дека е елиминиран целиот владин и воен врв на хутите“.

Ал-Рахави беше назначен за премиер на хутската влада во август минатата година, додека Мухамад Насер ал-Атафи беше министер за одбрана од 2016 и се смета за највисокиот воен функционер на групата.