Белата куќа потврди дека американски новинар по грешка бил додаден во необезбеден групен разговор на дигиталната платформа Сигнал, каде што високи функционери збореле за планови за напади врз Јемен.

Новинарот на магазинот „Атлантик“ Џефри Голдберг објави дека бил додаден во група во која биле и потпретседателот Џеј-Ди Венс и министерот за одбрана Пит Хегсет. Тој притоа видел доверливи воени планови за американски напади врз хутските бунтовници и тоа два часа пред да бидат изведени. Протекувањето беше жестоко критикувано од Демократите и предизвика загриженост кај Републиканците.

Голдберг кажа дека очигледно по грешка бил додаден во групниот разговор откако примил барање за поврзување од некого за кого излезе дека е советникот за националната безбедност на Белата куќа, Мајк Волц.

„Ако тие сакаа да изберат погрешен телефонски број, барем тоа не беше некој што ги поддржува хутите, бидејќи тие споделуваа информации за кои верувам дека би можеле да ги загрозат животите на американските службеници кои беа вклучени во таа операција“, рече Голдберг.

Доналд Трамп изјави дека не е запознат со текстот во „Атлантик“.

„Нападите врз хутите беа крајно успешни и делотворни. Претседателот Трамп и натаму има целосна доверба во својот тим за национална безбедност“, изјави портпаролката на Белата куќа, Керолајн Ливит.

И министерството за одбрана соопшти дека воената акција за која се разговарало на Сигнал била успешна. Сепак, Хегсет го критикуваше Голдберг како измамник и високо дискредитиран новинар, но одби да одговара на прашањата за протекувањето. Демократските конгресмени побараа да се спроведе истрага, опишувајќи ја епизодата како скандал.

Во својот текст во „Атлантик“, Голдберг напиша дека бил поврзан во групата на 11 март преку налог што му припаѓал на Волц. Тој во прв момент мислел дека е измама, но четири дена подоцна видел пораки за напади врз хутите и бил изненаден кога видел дека навистина имало експлозии во главниот град Сана. Во групата биле вклучени 18 лица, меѓу кои и државниот секретар Марко Рубио.

Советот за национална безбедност потврди дека она што е објавено во „Атлантик“ е автентично, додавајќи дека се испитува како погрешен број бил додаден во групата.