Претседателот на Транснистрија Вадим Красноселски апелираше до граѓаните да горат дрва за да се згреат и предупреди дека неизбежни се рестрикции на струја, откако Русија ги прекина испораките на гас преку Украина.

Красноселски, лидер на отцепениот молдавски регион, кажа и дека 1.500 згради се без греење и топла вода и речиси 72.000 приватни домови немаат гас.

„За среќа, нашиот регион е богат со дрва. Имаме резерви“, кажа тој, охрабрувајќи ги жителите во руралните средини да најдат и горат дрва.

Транснистрија, регион поддржан од Русија, се најде во енергетска криза од 1 јануари, кога Украина го запре транзитот на руски гас низ нејзина територија.

„Не можеме да избегнеме рестрикции на струја. Ова е неопходно за да се заштити системот. Сигурен сум дека сите ќе имаат разбирање“, вели Красноселски.