Саиф ал-Ислам Гадафи, синот на некогашниот либиски лидер Моамер Гадафи, е убиен близу границата со Алжир. Веста за смртта на 53-годишниот Гадафи ја објави шефот на неговиот политички тим.

Останува нејасно како и во кои околности бил убиен, но веста ја потврди и неговата сестра. Некои либиски медиуми објавија дека тој бил убиен од неидентификувани поединци во својата резиденција во градот Зинтан.

Саиф ал-Ислам Гадафи долго време важеше за највлијателната личност во земјата по татко му, кој ја водеше Либија од 1969 до соборувањето и смртта во 2011.

Роден во 1972, Саиф ал-Ислам имаше клучна улога во приближувањето на Либија до западот од 2000 година, но и во бруталното задушување на антивладините протести. По убиството на неговиот татко, Саиф беше затворен од ривалска милиција во Зинтан речиси шест години.