Американските воздушни сили го испратија „авионот на судниот ден“ во Европа, како дел од флотата што го придружува претседателот Џо Бајден на четиридневната турнеја. „Е4-Б најтвоч“ е дизајниран да служи како команден и контролен центар во случај на нуклеарна војна.

Пред неколку дена, портпаролот на Кремљ, Дмитри Песков, не ја исклучи можноста Русија да употреби нуклеарно оружје ако се најде под „егзистенцијална закана“.

Најмалку еден од четирите вакви американски авиони е во постојана подготвеност за моментално полетување во случај на нуклеарен конфликт. Еден од нив, во чија основа е преуреден „боинг 747“ и почна да се користи во 1980-ите, слетал во Велика Британија завчера.

Авионот е дизајниран да го издржи електромагнетниот пулс предизвикан од атомска детонација и одржува контакт со американските воени единици низ цел свет. Овие авиони можат да пренесат претседателски наредби и до американските нуклеарни подморници и подземни полигони за лансирање проектили, поради што често се нарекуваат „Летечки Пентагон“.

Изгледаат слично како претседателскиот авион “Ер форс уан“, но се дополнети со специјализирана набљудувачка и комуникациска опрема.