Руските сили го зазедоа стратешкиот рударски град Торецк во источна Украина, објави руското министерство за одбрана. Украина засега не ги коментираше овие наводи.

Торецк, што Русија го вика Џержинск, пред војната имаше околу 30.000 жители и припаѓа на регионот Доњецк, што Москва незаконски го анектираше.

Украинските воени аналитичари сметаат дека со освојувањето на Торецк, кој е сместен на висорамнина, Русија дополнително ќе ја отежни логистиката за украинските сили на истокот. Во исто време, на Русите им се отвора пат кон регионалниот логистички центар Костјантинивка, кој е поврзан со неколку клучни града.

Најголем дел од населението на Торецк одамна е избегано, а градот е уништен во голема мера како резултат на повеќемесечните борби и бомбардирања.