21-годишниот возач Васил Јованов, кој на 29 јануари возејќи пијан и без возачка дозвола, на пешачки премин поминувајќи на црвено светло ја прегази младата Фросина Кулакова, денеска во Кривичниот суд призна вина.

„Почитуван суде, сакам да изразам најдлабоко сочувство до семејството и да им се извинам. Тоа што сум го сторил не сум можел да замислам дека ќе се случи“, кажа Јованов.

Обвинителот од ОЈО Скопје Александар Марковски, како и мајката и таткото на Фросина, побараа највисока затворска казна за делото кое според обвинението, младиот Јованов го сторил со умисла. Јованов е обвинет за Тешки дела против безбедноста на луѓето и имотот во сообраќајот, дело за кое е предвидена максимална казна од 20 години затвор.

Обвинителот во воведниот збор рече дека ова не е само несреќа во која еден маж прегазил жена. Според него, сообраќајката е последица на низа сообраќајни пропусти и затоа возачот се гони за најтешката квалификација на кривичното дело.

„За нецела минута пред критичниот настан, обвинетиот сторил и други пропусти од сообраќајна природа од типот на цик-цак возење, поминување на две полни ленти. Тоа се докази за умислата за кривичното дело за кое се товари“, рече обвинителот.

Додаде дека Јованов е осудуван, иако не кажал дека бил осудуван кога ги давал своите генералии по апсењето.

Неговиот адвокат Сашо Дуковски кажа дека клиентот не е наркоман како што неправедно бил опишуван во јавноста, туку спортист со освоени медали и признанија во боксот.