Двајца припадници на американската Национална гарда се во критична состојба откако вчера беа застрелани близу Белата куќа во Вашингтон. Полицијата кажа дека пукал еден напаѓач, кој потоа бил совладан од други членови на Националната гарда.

Доналд Трамп, кој во тој момент бил во Флорида, кажа дека напаѓачот е авганистански државјанин кој влегол во САД во септември 2021. Набргу потоа, САД ја суспендираа обработката на сите барања за имиграција на авганистанските државјани.

Министерството за внатрешна безбедност го идентификуваше напаѓачот како Рахманулах Лакамал, опишувајќи го како криминалец од Авганистан. Неговиот имигрантски статус не е познат.

Десетици илјади Авганистанци влегоа во САД според специјална имигрантска заштита по хаотичното повлекување на Американците од земјата во 2021.

„Сега мора повторно да ги испитаме сите странци кои влегле во нашата земја од Авганистан во времето на Џо Бајден“, кажа Трамп.

Застреланите гардисти биле во патрола две улици подалеку од Белата куќа кога биле застрелани, кажа директорот на ФБИ, Каш Пател, додавајќи дека биле начекани во заседа. Властите рекоа дека напаѓачот бил застрелан четирипати од други гардисти кои биле во близина и дека не соработувал со истражителите.

„Животното што ги застрела двајцата припадници на Националната гарда ќе плати многу висока цена“, кажа Трамп и нареди распоредување на уште 500 гардисти во Вашингтон.