Министерот за култура и туризам Зоран Љутков најави дека отворањето на Турскиот театар во Скопје се очекува на крајот на 2026 или во почетокот на 2027 година.
„За таа зграда процесот беше запрен околу пет-шест години. Во 2023 почна да се става фасадата, сега работиме со многу забрзано темпо за да го завршиме. Се работи третата, последна фаза – ентериерното уредување и сценската технологија. која оди малку побрзо. Сè зависи од временските услови и од динамиката, би требало да биде готов до крајот на 2026 или во почетокот на 2027, кога Турскиот театар ќе се пресели во нова зграда“, рече Љутков на настан во Театар Комедија.
Турскиот театар во Скопје постои 75 години, а веќе 10 години ги користи просториите на Театар Комедија. Објектот, кој се наоѓа во населбата Пролет близу Железничката станица, почна да се гради пред 11 години.
Објектот е проект на Министерството за култура и институцијата Турски театар, кој се јавува како инвеститор. Автор на идејното решение е архитектот Виктор Михајлов, кој е автор и на објектот на Филхармонијата. Театарот има две сали, голема со 329 места и мала со 120 места. Функционално, објектот е на седум нивоа, од кои пет надземни и два подземни.
Изградбата на карабината почна на 23 јуни 2014, а беше завршена и примопредадена на 15 јуни 2017.
- ПО 11 ГОДИНИ ОД ПОЧЕТОКОТ НА ИЗГРАДБАТА, ТУРСКИОТ ТЕАТАР ВО СКОПЈЕ ПОЧНУВА ВНАТРЕШНО ДА СЕ УРЕДУВА И ОПРЕМУВА
- НОВАТА ЗГРАДА НА ТУРСКИОТ ТЕАТАР ВО СКОПЈЕ ГО ЧЕКА ТЕНДЕРОТ ЗА ИНСТАЛАЦИИ
- ПО ДЕВЕТ ГОДИНИ ОД ПОЧЕТОКОТ НА ГРАДБАТА, ГОТОВИ СЕ ФАСАДАТА И КРОВОТ НА ТУРСКИОТ ТЕАТАР ВО СКОПЈЕ
Б. НЕСТОРОСКА
