Во касарната „Страшо Пинџур“ во Петровец денеска беа претставени 17 нови лесни оклопни возила од типот „страјкер“. Оваа опрема е дел од договорот со Соединетите Американски Држави за модернизација на македонската Армија со современи борбени средства.
Премиерот Христијан Мицкоски изјави дека со пристигнувањето на овие возила значително се зајакнува капацитетот на Армијата. Тој изрази благодарност до припадниците на војската, Министерството за одбрана и стратешките партнери од САД за поддршката и логистиката. Според него, новата опрема ја подобрува оперативната подготвеност и мобилноста, со што Армијата станува поконкурентна во однос на другите воени сили.
Мицкоски рече дека Владата ќе продолжи да вложува во одбраната за да се исполнат критериумите за модернизација до 2032 година. Тој додаде дека земјава веќе го надминува минимумот од два проценти од бруто-домашниот производ за инвестиции во одбраната, што ја сместува меѓу сојузниците кои издвојуваат повеќе средства за оваа намена.
Набавката на вкупно 54 возила „страјкер“ беше одобрена од американскиот Стејт департмент во март 2021 година. Проектот е вреден 210 милиони долари и претставува дел од долгорочниот план за развој на одбранбените способности на државата во согласност со стандардите на НАТО.
