САД воведоа нови царини за 60 трговски партнери поради тврдења дека не успеале да ја спречат принудната работа. Царините се движат од 10% до 12,5% и се насочени кон клучните економски партнери, вклучувајќи ги Велика Британија, Кина, Европска Унија, Канада, Бразил, Јапонија, Индија, Русија и Турција.

Тие стапија во сила денеска, веднаш откако истече привремената царина од 10% на странска стока. Врховниот суд на САД претходно оваа година пресуди дека голем дел од глобалните царини наметнати во рамките на вонредните овластувања биле нелегално воведени. Трамп оттогаш бараше други начини да ја спроведе својата водечка трговска политика.

Минатиот месец, Белата куќа предложи царини од 10%-12,5% за увоз од десетици земји поради загриженоста дека не преземаат доволно за справување со принудната работа.

„Новата мерка ќе започне да го коригира она што е истовремено злоупотреба на човековите права и искривувачка трговска практика заради подобрување на благосостојбата на работниците насекаде“, изјави трговскиот претставник на САД, Џејмисон Грир, повикувајќи се на Член 301 од Законот за трговија од 1974 година.

Новите давачки се однесуваат на 99,4% од увозот од 60-те најголеми трговски партнери на САД.
Бразил, Јапонија и Австралија кажаа дека новите царини се неоправдани, а тие беа критикувани и од Кина, која кажа дека во земјата не постои принудна работа.

Шефицата за надворешна политика на ЕУ, Каја Калас, го доведе во прашање образложението на Вашингтон за воведување нови царини, велејќи дека обвинувањата за недостатоци во контролата на принудната работа во блокот се неосновани.