Властите во Венеција оваа сезона собраа повеќе од 5 милиони евра од таксата за влез што се наплаќа од дневните посетители на оваа популарна италијанска дестинација. Таксата, која изнесува меѓу 5 и 10 евра, се наплаќа во текот на 60 одбрани денови со најголема посетеност во главната туристичка сезона, од април до јули.

Оваа сезона таксата ја платија повеќе од 650.000 посетители. Во останатиот дел од годината, дневните посетители можат да влезат во градот бесплатно. Градоначалникот Симоне Вентурини предложи следната година таксата за влез да се зголеми на износ меѓу 30 и 50 евра за деновите кога се очекува особено голем број туристи. Сепак, градоначалникот нема овластување сам да ја зголеми таксата за влез. Иако таксата беше воведена со општинска одлука, нејзината горна граница е утврдена со државен закон. Затоа, Вентурини мора да се консултира со владата во Рим.

Целта на таксата е да помогне во подоброто управување со масовниот туризам во градот, кој изобилува со бројни уникатни знаменитости. Денес, во историскиот центар на Венеција сè уште живеат речиси 50.000 луѓе, бројка што е помала од вкупниот капацитет на хотелски кревети во градот. Хотелските гости кои престојуваат подолго време во градот се ослободени од плаќање на дневната такса, но се обврзани да платат такса за ноќевање.