Три лица загинаа во нападите врз саудиски аеродроми, додека се интензивираат борбите во Јемен помеѓу хутите, кои се поддржани од Иран и владините сили поддржани од Саудиска Арабија.

Едно лице загина, а осум беа ранети во напад врз Меѓународниот аеродром „Крал Калид“ во саудискиот главен град Ријад, додека две лица загинаа, а 28 беа ранети во напад врз објекти на аеродромот во Абха.

Коалицијата предводена од Саудиска Арабија вети одмазда, порачувајќи дека нападите нема да поминат неказнето. Таа наведе дека нападнала повеќе од 80 воени цели на хутите.

Хутите вчера го нападнаа и меѓународниот аеродром во Аден со балистички ракети и дронови. Министерството за транспорт на Јемен соопшти дека една ракета паднала во близина на пистата, само неколку минути пред планираното слетување на авион од Каиро.

Во последните денови, борбите во Јемен се концентрирани на подрачјата околу теснецот Баб ел-Мандеб, клучна поморска рута за извоз на енергенси. Оваа недела, јеменските владини сили, со воздушна поддршка од Саудиска Арабија, започнаа контраофанзива за повторно заземање на стратешки територии во близина на теснецот и околу градот Мока, кои хутите ги имаа освоено во септември.

Од обновувањето на војната, хутите во повеќе наврати ја нападнаа саудиската инфраструктура, вклучувајќи аеродроми, рафинерии и цевководи.

Сирија разгледува можност за обезбедување воена помош за својот сојузник Саудиска Арабија, изјавија еден американски и еден сириски воен претставник. Еден сириски дипломат изјави за „Ројтерс“ дека Сирија цврсто стои зад Саудиска Арабија, но дека главниот фокус на владата е насочен кон домашните приоритети.