Во конкуренција на 22 екипи со вкупно 180 учесници на шестиот национален натпревар по роботика што се одржа во Штип, апсолутен победник е едукативниот центар стем роботика од Кочани кој ги освои првите места и во категоријата на млади роботичари од 6 до 10 години и во категоријата на учесници од 10 до 16 години.
Повозрасната екипа на кочанскиот едукативен центар стем роботика со ова прво место стекна право да учествува на светскиот шампионат по роботика што од 7 до 9 јуни ќе се одржи во Масачусетс, САД. Екипата е составена од ученици од Кочани, но и од Виница кои се редовни членови на едукативниот роботски центар во Кочани и тоа Андреј Дамјанов, Горјан Тасев, Филип Ристов, Тања Врчко, Глигорие Фудолски, Бране Тасев, Љубиша Митев и Славе Јорданов.
„Натпреварувањето е под закрилата на ООН која за оваа година ја одреди тематиката на иновативни проекти на места за рекреација со помош на новите технологии. Победниците беа најдобри во сите четири категории, основни и иноваативни вредности, потоа во проектна тематика, во робот дизајн и роботска игра. Оваа екипа беше национален победник и пред две години, а приматот го потврди и на годинашниов државен натпревар во рамките на Фирст Лего лигата на Македонија“, вели претседателот на лигата Гордан Анастасов.
Т. ЈОВАНОВСКИ
