Општина Конче разработува проект за формирање пензионерски центри во четири населени места, со кои ќе бидат опфатени 400 пензионери, колку што ги има во оваа општина. Како инвестиција, проектот ќе стартува со целосно учество на Општина Конче, а истовремено се работи на тоа тој да влезе во Програмата за развој на Обединетите нации (УНДП).

„Планираме проектот да биде наменет за постарите жители и тоа во четири населени места, Дедино, Долно Липовиќ, Ракитец и Лубница. Порано градевме за младите со цел да ги задржиме да не се иселуваат, а со овој проект за најворзасните го менуваме ставот: ако ги задржиме постарите, ќе ги задржиме и помладите. Првин се иселуваат постарите во семејствата, а потоа ги повлекуваат и своите деца, па практично цели семејства заминуваат во странство“, вели радоначалникот Златко Ристов.

Според последниот попис, Општина Конче имала 3.700 жители, но денес овој број е сведен на околу 3.000. Од вкупното население, од 15 до 20 проценти се пензионери за кои мора да се подобруваат условите за живот и поминување на нивното секојдневие. Миграцијата е присутна, но за разлика од некои други општини, во Конче не е толку зголемена.

Првиот човек на Конче објаснува дека општината има ресурси за планираните центри, од кои поголем дел се во објекти во нејзина надлежност, а се работи за простории главно во рамките на веќе обновени културни домови. Дел од објектите кои ќе бидат наменети за пензионерските центри целосно ќе се реновираат, адекватно ќе се адаптираат и комплетно ќе се опремат според потребите на пензионерите.

Ристов предвидува овој проект да ја чини општината околу 400.000 денари и дека целиот проект да биде ставен во функција до крајот на оваа година.

Т. ЈОВАНОВСКИ