„Ќе настојуваме во наредните неколку месеци интезивно да се одвиваат работите за доизградба на зимскиот базен во Штип, кој веќе петта година тапка во место без нешто да се гради. Се надевам, со ангажман и разбирањето на изведувачот на работите ќе успееме зимскиот базен да го ставиме во функција на граѓаните, посебно на младите членови на пливачките клубови во Штип“, рече министерот за спорт Борко Ристовски кој денеска изврши увид на работите за зимскиот базен.

Базенот почна да се гради во времето на директорот на тогашната Агенција за млади и спорт (АМС) Дарко Кевски, кој во февруаери 2020 го стави камен темелникот. Според првичните најави, базенот требаше да биде даден во употреба до крајот на 2021. Следниот директор Наумче Мојсовски за време на целиот негов мандат воопшто не дојде во Штип и да изврши увид на работите на зимскиот базен чија изградба повеќе од четири години беше во застој. Започаниот објект беше обраснат во трева, а лани протипожарната единица во последен момент го спаси објектот од пожар.

Зимскиот базен во Штип што чини 600.000 евра е дел од програмата за затворени базени на тогашната АМС, која предвидуваше изградба на зимски базени во 14 градови во Македонија, од која се реализираа само два. Според сегашното Министерство за спорт,  Штип е еден од петте градови во Македонија кои до крајот на летото ќе имаат изградени зимски базени.

Т. ЈОВАНОВСКИ