По Прилепскиот театар, од безбедносни причини затворени се и Големата сала во Центарот за култура „Марко Цепенков“ и киносалата „Мис Стон“ во Прилеп, потврди за САКАМДАКАЖАМ.МК директорката на Центарот, Марија Попова-Јованоска.
Објектите се затворени по извршената контрола од инспектор на Дирекцијата за заштита и спасување (ДЗС) при што биле констатирани слабости со хидрантска мрежа, влезовите, несоодветен громобран и друго.
Директорката Попова-Јованоска вели дека констатираните недостатоци за Големата сала и Киното „Мис Стон“ се брзо решливи и се надева дека ќе се надминат и тие повторно ќе бидат ставени во функција.
На 25 март годинава беше забрането користење на Театарот во Прилеп зашто Дирекцијата за заштита и спасување (ДСЗ) утврдила дека е небезбеден за масовни приредби. Меѓу констатираните недостатоци се немање хидрантска мрежа, несоодветен громобран, систем за дојава на пожари, начинот на отворање и димензиите на вратите, неисправна електрична инсталација и друго. Сите премиери, театарски поставки и други настани од масовен карактер се одложени на неодредено време.
Контролите беа направени по барање на Центарот за култура во Прилеп, во чиј склоп опстојува и Театарот, откако Министерството за култура и туризам по пожарот која се случи во Кочани во кој загинаа 59 лица, а над 200 беа поврредени, испрати допис до сите национални установи од областа на културата за целосна проверка на состојбата на објектите Засега освен за објеките во Прилеп, нема известување за тоа колку другите објекти кои се под Министерство за култура во државата ги задоволуваат потребните услови во делот на заштита од пожари, експлозии и опасни материи.
Ж. ЗДРАВКОВСКА
