Проектот за изградба на нова театарска зграда за Народниот театар „Војдан Чернодрински“ во Прилеп е готов од крајот на летото 2024, но уште се чека одобрение за градба, велат од прилепскиот Центар за култура „Марко Цепенков“ под чија надлежност е оваа театарската институција.
Од 25 март годинава забрането е користење на театарскиот објектот, зашто Дирекцијата за заштита и спасување (ДСЗ) утврдила дека е небезбеден за масовни приредби. Меѓу констатираните недостатоци се немање хидрантска мрежа, громобрани, систем за дојава на пожари, начинот на отворање и димензиите на вратите, неисправна електрична инсталација и друго. Сите премиери, театарски поставки и други настани од масовен карактер се одложени на неодредено време.
Проектот за нова театарска зграда за Прилеп не е меѓу активностите наведени во соопштението за одлуките што Владата ги донесе на седницата на 1 април, а во врска со прифатената Програма за нови објекти и реконструкција, санација и адаптација на постојните од областа на културата за 2025 година. Владата соопшти дека ќе бидат обезбедени 123 милиони денари (речиси 2 милиона евра) од буџетот за 11 проекти во Тетово, Струмица, Скопје, Битола, Куманово, но не е спомнат Театарот од Прилеп кој месец дена пред затворањето на објектот прослави 75 години постоење. Меѓу проектите што ќе се финансираат е и реконструкција на поранешно кино „Партизан“ во Битола кое е руинирано и нефункционално со години, додека пак, Театарот во Прилеп е етаблирана установа која измините неколку години освојува врвни награди на театарските фестивали во земјава и странство.
Директорката на Центарот за култура „Марко Цепенков“ Марија Поповска-Јованоска за САКАМДАКАЖАМ.МК рече дека во моментов, заедно со Министерството за култура бараат начини Театарот и да се стави во функција.
„Во постојана комуникација сме. Во моментов правиме планови која е најдобрата опција и за Театарот и за публиката, да биде на општо добро. Ансамблот работи, подготвува претстави за кога ќе се оспособиме, да имаме готови производи“, рече директорката.
Таа додаде дека постоечки проект има за изградба на нова театарска зграда, не на локацијата каде е моментално Театарот, но повторно во склоп на Центарот за култура.
„Проектот е завршен од крајот на летото минатата година. Во исечекување сме на дозвола за градба. Како што наидува на недостатоци Министерството за транспорт и врски, така нив ги отстрануваат проектантите“, рече Поповска-Јованоска.
Раководителот на Театарот Михајло Милекоски вели дека тоа што остана без публика е болно, но животот продолжува, мора да се оди напред, театарот е жив и мора да живее, а решение ќе се најде во соработка со Министерството за култура.
Театарот „Војдан Чернодрински“ од 1950 до денеска има подготвено и одиграно околу 400 премиери, кои што ги проследиле над 2 милиони гледачи.
Културните работници во Прилеп велат дека моменталната ситуација е последица на проблеми напластувани долги години. Прилепскиот ансамбл, познат по својот квалитет, со години твори во тешки услови под сите стандарди. Сместен е во објект кој до 1945 функционирал како киносала на семејството Напески, а во текот на годините освен покривот немало други поголеми реконструкции. Изградба на нова театарска куќа беше и една од поентите во програмите на кандидатите за градоначалници на изборите во 2017, но оттогаш завршија речиси два мандата, а плановите не се спроеведоа.
До 2004 Театарот „Војдан Чернодрински“ функционирал и како самостојна културна установа, а потоа Министерството го спои со Центарот за култура, што беше случај и во други градови од земјава, со исклучок на Битола.
Ж. ЗДРАВКОВСКА
