За една недела ќе се знае што точно се случи вчераутро (петок), кога одводниот канал кај село Таор, Општина Зелениково, што се влива во реката Вардар, беше целосно прекриен со густа бела пена. Ова го најавија по вонредниот инспекциски надзор од Државниот инспекторат за животна средина (ДИЖС), чии инспектори биле на терен во текот на вчерашното попладне.

„За да се утврди што точно тече во Вардар, на барање на Општината, екипи од Институтот за јавно здравје веднаш зедоа мостри од водата и од сомнителната пена за хемиска анализа. Резултатите, кои ќе бидат готови наредната недела и доставени до ДИЖС, треба да покажат дали станува збор за детергенти, индустриски хемикалии или друг вид опасен (или неопасен) отпад. Поради поврзаноста на системите за одведување на отпадни води, се разгледува можноста овој настан да е во корелација со загадувањето со пена од пред неколку дена во Општина Гази Баба – инцидент предизвикан од приватен автосервис кај клучка Ченто, кој ќе биде санкциониран согласно надлежностите на Инспекторатот на Град Скопје“, соопштија од ДИЖС.

Инцидентот, кој беше регистриран вчера (21 ноември), според ДИЖС, се случил веднаш по активирањето на пумпите за отпадни води од системот на Скопско Поле, при што визуелно било утврдено можно сериозно хемиско загадување на Вардар. Овој систем ги собира отпадните води од широк појас што ги опфаќа општините Гази Баба, Арачиново, Илинден и Петровец – регион каде што има и индустриски капацитети и земјоделски површини. Пената е расчистена вчера во попладневните часови.

П. ПЕЧКОВ