Средношколци од 15 земји ќе учествуваат на 31. издание на Балканската олимпијада по информатика, која ќе се одржи во Охрид од 20 до 26 септември. Балканската Олимпијада по информатика е натпревар во програмирање за средношколци од Југоисточна Европа.
Професор д-р Миле Јованов, претседател на Здружението на информатичари на Македонија, вели дека Балканската Олимпијада по информатика ќе ја поттикне соработката помеѓу балканските народи и е инспирација за млади таленти во областа на технологијата и иновациите.
„БОИ 2024 е натпревар помеѓу новите генерации информатичари, но истовремено е и платформа во чии рамки младите умови се здружуваат, се запознаваат со различни култури, се дружат, се вмрежуваат и разменуваат искуства од сферата на информатиката и иновациите, инспирирајќи се меѓусебно и претставувајќи еден вид стимул едни за други. Со поттикнување на овој дух на соработка и конкуренција, ја негуваме следната генерација лидери во технологијата, што е од витално значење за континуираниот раст и развој на нашето општество. Чувствувам и лична сатисфакција кога гледам како Балканската иницијатива, која стои зад организацијата на БОИ, се подобрува секоја година откако јас претседавам со неа, а сѐ повеќе земји се заинтересирани да пристапат кон иницијативата. Во последните неколку години ни се придружија Словенија и Италија, а веќе три години интерес за приклучување покажува и Украина“, вели јованов.
Како поддржувач и пријател на Балканската Олимпијада по информатика, компанијата „Сорсикс“ (Sorsix), една од водечките ИТ компании во Македонија, додели ваучери за платена пракса за осумтемина македонски учесници.
