Во средното медицинско училиште „Д-р Панче Караѓозов” во Скопје од оваа учебна година е отворена паралелката фармацевтски техничар во фармацевтска индустрија. Паралелката е отворена на иницијатива на средното медицинско училиште и на компанија „Алкалоид“. Изготвена е наставна програма која е верификувана и одобрена од Министерството за образование и адаптирана на потребите на секторот на фармацевтската индустрија.

Наставната програма е специјално креирана за ученици од трета и четврта година од секторот здравство и здравствена заштита во средното стручно образование.

Оваа учебна година, по големиот интерес на пријавени, 23 ученици беа селектирани за да ја следат наставата во новоформираната парцијално-дуална паралелка. Наставата ќе се одвива во просториите на училиштето и во компанијата „Алкалоид“, со стручни наставници и сертифицирани ментори. Учениците  во практичниот дел од наставата ќе бидат директно вклучени во работниот процес на компанијата, со што ќе се стекнат со потребните знаења и вештини што ги прави конкурентни на пазарот на трудот, со можност за вработување веднаш по завршувањето на средното образование. Компанијата ќе обезбеди заштитна опрема, систематски прегледи, топол оброк и месечни стипендии од 3.000 денари за секој од овие ученици во текот на нивното школување.