Во Галеријата „Јустина и Родољуб Анастасов“ во Музејот на Град Скопје вечерва во 19:30 часот ќе се отвори Годишната изложба на дела на Родољуб Анастасов од колекцијата на Галеријата.

Станува збор за презентација на 30-ина дела од најзначајните циклуси на авторот, вредна донациска збирка од околу 400-ина дела од различни временски периоди (создадени од 1957 до 2010 ) и претставува своевиден пресек на повеќе ликовни стилови и тенденции во современата македонска ликовна уметност.

„Овие дела се белег за автентичниот и единствен креативен опус на Анастасов. Овогодинешната изложба претставува еклектичен избор од неколку циклуси на Анастасов, слики од циклусот на кој му е најдолго посветен – ‘Човек и простор’, ‘Човек и време’, ‘Во потрага по изгубениот простор’, импресивните цртежи од циклусите ‘Делување на елементите’, ‘Промена на обликот’, ‘Трансфигурирање’, создадени во периодот помеѓу 1957 – 1960 година, и кои припаѓаат на т.н. енформелска лабораторија“, вели кураторката Анита Бошкова-Доковска.

Изложбата ќе трае до декември 2024.