Кинематограферот оскаровец Воли Фистер, соработник на режисерот Кристофер Нолан и кинематограферот Дариус Конџи, кој има две номинации за Оскар за филмовите „Евита“ на Алан Паркер и „Бардо“ на Алехандро Гонзалес Ињариту се двајца нови лауреати на 46. издание на Интернационалниот фестивал на филмска камера (ИФФК) „Браќа Манаки“ во Битола (20-26 септември).
Директорот на Фестивалот, Димитрија Доксевски на денешната прес-конфернција кажа дека Фистер, кој работел на филмовите на Нолан „Зачеток“, „Темниот витез“, „Бетмен почнува“ и „Мементо“, ќе добие Специјална Златна Kамера 300 за особен придонес во филмската уметност и ќе одржи работилница во Битола. Фистер во 2011 доби Оскар за најдобра кинематографија за „Зачеток“.
Иранско-францускиот кинематографер Конџи, кој работел на филмовите како „Седум“ и „Соба за паника“ на Дејвид Финчер, „Плажата“ на Дени Бојл, „Полноќ во Париз“ на Вуди Ален, „Украдена убавина“ на Бернардо Бертолучи, а има снимано и видеоспотови за ѕвезди како Мадона, Леди Гага и Тејлор Свифт, ќе добие Златна камера 300 за животно дело.
Македонските филмови „Мајка “ на Теона Митевска и „Диџеј Ахмет“ на Георги Унковски ќе го отворат и затворат 46.издание на „Браќа Манаки“.
Турскиот режисер Семих Капланоглу е годинашен добитник на Специјалната Камера 300 за особен придонес во светската филмска уметност.
Композиторот и еден од најзначајните современи музичари Кирил Џајковски е годинашен добитник на наградата Голема ѕвезда на македонскиот филм што ја доделува Друштвото на филмски работници (ДФРМ). Наградата на Џајковски ќе му биде врачена на затворањето.
Б. НЕСТОРОСКА
