Договорот за реконструкција и адаптација на просторот доделен на Националната установа (НУ) Џез оркестар, кој го доби како траен дом од Владата, денеска го потпишаа вицепремиерот за економски прашања Фатмир Битиќи, министерката за култура Бисера Костадиновска-Стојчевска и генералниот директор на ТАВ Фатих Кан. Просторот од 475 квадратни метри е дел од објектот на Националната опера и балет (НОБ).
„Со потпишување на договорот, го правиме последниот чекор непречено да почнат градежните работи во домот на Џез оркестар. Откако оваа нова национална установа со одлука на Владата доби трајна адреса во рамките на овој објект, со одлука на Владата беа обезбедени 10 милиони денари од ТАВ програмата за целосно реновирање на просторот во достоен дом на џезот“, кажа министерката Костадиновска- Стојчевска.
Таа рече дека целта на сите договорени страни е брза реконструкција и добивање на објект според светски стандарди.
„Културата не смее да си дозволи уште еден објект чие реконструирање ќе трае кратко, а потоа неговото одржување ќе биде агонично и бескрајно. Такви објекти наследивме, и доста е. Џезот, кој како жанр ја претпочита слободата и храбро се соочува со импровизацијата, е и стил на живеење“, кажа Костадиновска- Стојчевска.
Гоце Стефковски, в. д. директорот на Џез оркестарот, рече дека Владата донела вистинско решение откако ја препознала нивната работа како Биг бенд, и со тоа ќе се овозможи на џез кадрите кои се школувале во странство да го пренесат знаењето дома.
„Овој проект вреден 10 милиони денари, е еден од 95-те специјални проекти на Владата кои ние ги финансираме, а истите се со вкупна вредност од 49.7 милиони евра. До крајот на годината ќе имаме завршено вкупно 70 проекти од 95-те кои ги финансираме“, рече генералниот директор на ТАВ Фатих Кан.
„Потпишувањето на договорот за реконструкција е дел од мозаикот на едно општество. Секој е важен, секој треба да биде претставен и секој заслужува еднакви права. Токму затоа, новиот дом на џезерите доби 11 милиони и 700 илјади денари од кои 10 милиони се средства од ТАВ програмата“, рече вицепремиерот Битиќи.
Директорот на Операта, Васко Ристов кажа оти џез музиката е битен дел од културата и дека му е драго што колегите џезери добиле свој простор во НОБ.
М. ЏАРОВСКА
