Во тек е втората и завршна фаза од реновирањето на просторот за Националниот џез оркестар (НЏО), кој се наоѓа под објектот на Националната опера и балет (НОБ), кажаа денеска министерот за култура и туризам Зоран Љутков и директорот Гоце Стевковски. Станува збор за современ и функционален простор од околу 500 квадратни метри, каде ќе има голема сала за вежбање на Оркестарот која ќе биде поврзана со тонско студио, гардероби, канцеларии и други помошни простории.
Основниот проект за реновирање и уредување на овие простории кај НОБ е изработен во 2023 од „Мегарон-инженеринг“.
„Првата фаза, која е реализирана во согласност со договорот меѓу Владата, ТАВ Македонија, ‘Тав Тепе Акфен’ и Министерството за култура и туризам и е во вредност од 10 милиони денари (над 160 илјади евра), веќе е завршена, односно беа изведени најсуштинските работи: целосна инфраструктурна подготовка на просторот, нови инсталации, хидроизолација, преградни ѕидови и сериозни градежно- занаетчиски работи.
Сега е во тек втората фаза, која ќе му го даде конечниот изглед на просторот, односно: завршна обработка на подови, акустична обработка, внатрешна столарија и санитарна опрема. За оваа фаза веќе е склучен договор со компанијата ‘ПМГ Констракшн’ ДООЕЛ Скопје, во вредност од над 7,3 милиони денари, а рокот за реализација е 90 дена од воведување во работа на надзорот“, кажа Љутков.
Стефковски вели дека втората фаза почнала вчера и очекува да се вселат во септември.
Џез оркестарот е основан со одлука на Владата во март 2023, на иницијатива од Здружението на џез-музичари и слободни уметници (ЗЏМ). Националниот џез оркестар во март 2024 го доби просторот во зградата под Националната опера и балет.
- ПРОСТОРИИТЕ НА ЏЕЗ-ОРКЕСТАРОТ УШТЕ НЕ СЕ ЗАВРШЕНИ ОТИ ПРОПАДНА ТЕНДЕРОТ ЗА ВНАТРЕШНОТО УРЕДУВАЊЕ
- ВО ПРЕГОВОРИ СМЕ ЗА ПРОСТОР ЗА РАБОТА НА ЏЕЗ-ОРКЕСТАРОТ, ВЕЛИ ЉУТКОВ, КАНЦЕЛАРИИТЕ ПОД ОПЕРАТА УШТЕ НЕ СЕ ГОТОВИ
- ЏЕЗ-ОРКЕСТАРОТ УШТЕ НЕ ГО ДОБИ ПРОСТОРОТ ПОД ОПЕРАТА ОТИ ПРВО ТРЕБА ДА СЕ САНИРА ПЛАТОТО КОЕ ПРОТЕКУВА
- ЗАВРШИ ПРВАТА ФАЗА ОД ИЗГРАДБАТА НА СЕДИШТЕТО НА ЏЕЗ-ОРКЕСТАРОТ, МИНИСТЕРСТВОТО ЗА КУЛТУРА ВЕЛИ ЗА КОМПЛЕТИРАЊЕ ЌЕ ИМА ПАРИ И СО РЕБАЛАНСОТ НА БУЏЕТОТ
Б. НЕСТОРОСКА
