„Гугл“ потврди дека го преименувал Мексиканскиот Залив во Американски Залив на Гугл мапс за корисниците во САД, по извршната наредба потпишана од Доналд Трамп.

Тој ќе остане Мексикански Залив во Мексико, додека корисниците надвор од САД и Мексико ќе можат да ги видат двете имиња. Врвот Денали, кој е највисок во Северна Америка, ќе биде преименуван во Мекинли во САД.

„Имаме долготрајна практика на примена на промена на имиња кога тие се ажурирани од влади. Кога официјалното име е различно во различни држави, корисниците на Мапс го гледаат нивното официјално име“, објави „Гугл“ на Икс.

Трамп ја објави промената на името на Мексиканскиот Залив веднаш по враќањето во Белата куќа. Реагирајќи на промената, мексиканската претседателка Клаудија Шеинбаум на шега предложи Северна Америка да се преименува во Мексиканска Америка, според името што се користи во документ од 1814 што му претходел на уставот на Мексико.